അവര്‍ എന്നെ തുറിച്ചു നോക്കി,
ഞാന്‍ തന്നെയെന്റെ ദൈവം എന്നു
പറഞ്ഞതിന്.
(സത്യം പറഞ്ഞുകൂടാ..!)

അവര്‍ എന്നെ കല്ലെറിഞ്ഞു, ഒരുവനെയുപേക്ഷിച്ച് മറ്റൊരുവനെ പ്രണയിച്ചതിന്.
( സത്യം ചെയ്തുകൂടാ .. )

അവര്‍ എന്നെ വിചാരണ ചെയ്തു,
മുഖംമൂടികള്‍ അണിഞ്ഞതിന്.
(തെറ്റ് എന്റേതുതന്നെ മുഖംമൂടികലയില്‍ വൈദഗ്ധ്യം പോരായിരുന്നു..)

അവര്‍ എന്നെ തൂക്കിലേറ്റി ,
എന്റെ നേരിനെ പെറ്റുപോറ്റാന്‍ ശ്രമിച്ചതിന് .
(എത്രതന്നെ ശരിയാണെങ്കിലും പടുമുളകള്‍ വെട്ടിനിരത്തപ്പെടും ..)

ഇനിയവരെന്റെ ശവം ഭക്ഷിക്കട്ടെ..
(സത്യത്തിന്റെ രുചി..!)